ಯಾರಿವನ್, ಈ ರಾಘವನ್?

ಹೆಸರು ತಮಿಳರದ್ದು
ಹುಟ್ಟಿದ್ದು ಕರ್ನಾಟಕದಲ್ಲಿ
ಕೆಲಸ ಮಾಡಿದ್ದು ಇಂಗ್ಲಿಶ್ ಪತ್ರಿಕೆಯಲ್ಲಿ
ಈಗ ಕನ್ನಡ ಪತ್ರಿಕೆ ಸಂಪಾದಕ
ಯಾರಿವನ್?

ಅವರೇ ಈ ರಾಘವನ್!!!!!!!!!!!

ಇದು ಮಾಧ್ಯಮ ವಲಯದಲ್ಲಿ ಸದ್ಯ ಚಾಲ್ತಿಯಲ್ಲಿರುವ ಹೊಸ ಒಗಟು.

ಕಂಡು ಕೇಳರಿಯದ, ಗೊತ್ತಿಲ್ಲದ ವ್ಯಕ್ತಿಯೊಬ್ಬರು ದಿಧೀರನೆ ಕನ್ನಡ ಪತ್ರಿಕೋದ್ಯಮಕ್ಕೆ ಕಾಲಿರಿಸಿದಾಗ, ಅದೃಷ್ಟವಶಾತ್ ಕನ್ನಡ ನಂಬರ್ ಒನ್ ಪತ್ರಿಕೆ ಸಂಪಾದಕರು ಆದಾಗ ಕನ್ನಡ ಓದುಗರು ಯಾರಿವನ್ ಎಂದು ತಲೆ ಕೆರೆದುಕೊಂಡಿದ್ದರು.  ಹಾಗೆ ತಲೆ ಕೆರೆದು ಗಾಯ ಮಾಡಿಕೊಂಡವರಲ್ಲಿ ನಾವು ಇದ್ದೆವು. ಪತ್ರಕರ್ತರು ಅಚ್ಚರಿಪಟ್ಟಿದ್ದರು. ಹೆಚ್ಚಿನವರಿಗೆ ಇಂದಿಗೂ ಈ ರಾಘವನ್ ಯಾರೆಂಬುದು ಗೊತ್ತಿಲ್ಲ. ಇಂಟರ್ ನೆಟ್ನಲ್ಲಿ ಹುಡುಕಿದರು ಸಿಗಲಿಲ್ಲ. ಯಾಕೆಂದರೆ ಇವರು ಕನ್ನಡ ಪತ್ರಿಕೋದ್ಯಮದ ಧೀಮಂತ ಪತ್ರಕರ್ತರು ಅಲ್ಲ, ಇಂಗ್ಲೀಷ್ ನಲ್ಲಿ ಅಂತಹ ಸಾಧನೆಯನ್ನು ಮಾಡಲಿಲ್ಲ.

ಇವರು ಹುಟ್ಟಿದ್ದು ಮೈಸೂರಿನಲ್ಲಿ. ಆರಂಭದಲ್ಲಿ ಕೆಲಸ ಮಾಡಿದ್ದು ಇಂಡಿಯನ್ ಎಕ್ಸ್ಪ್ರೆಸ್ಸ್ ನಲ್ಲಿ. ಆಮೇಲೆ ಸೇರಿಕೊಂಡಿದ್ದು ಟೈಮ್ಸ್ ಆಪ್ ಇಂಡಿಯಾ. ಅಲ್ಲಿಂದ ಅವರನ್ನು ಇಕನಾಮಿಕ್ ಟೈಮ್ಸ್ ಗೆ ವಾರ್ಗಾಯಿಸಲಾಗಿತ್ತು. ಬಹುಷಃ ವಯಸ್ಸಾಯಿತು ಎಂಬ ಕಾರಣಕ್ಕೆ. ಇಕನಾಮಿಕ್ಸ್ ಟೈಮ್ಸ್ ನಲ್ಲಿ ಅವರು ರಾಜಕೀಯ ವರದಿ ಮಾಡುತ್ತಿದ್ದರು! ಅನುಭವಿ ಪತ್ರಕರ್ತರು!

ಕರ್ನಾಟಕದಲ್ಲಿ  ಇಕನಾಮಿಕ್ ಟೈಮ್ಸ್ ಇನ್ಚಾರ್ಜ್ ಆಗಿದ್ದರು, ಇಲ್ಲಿ ಸಿದ್ಧವಾಗುತ್ತಿದ್ದುದು ಕೇವಲ ೨ ಪುಟ ಮಾತ್ರ. ಉಳಿದ ಪುಟಗಳೆಲ್ಲ ಮುಂಬಯಿಯಿಂದ ಬರುತ್ತಿದ್ದವು. ಇಂತಿಪ್ಪ ರಾಘವನ್ ವಯಸ್ಸಿನ ಆಧಾರದಲ್ಲಿ ನಿವೃತ್ತಿಯಾಗಿದ್ದರು. ನಿವೃತ್ತಿಯಾಗಿ ೫ ವರ್ಷ ಮನೆಯಲ್ಲಿದ್ದರು.

ಮನೆಯಲ್ಲಿ ನಿವೃತ್ತಿ ಜೀವನ ನಡೆಸುತ್ತ, ಸಮಯದೂಡುತಿದ್ದ ರಾಘವನ್ ಅವರನ್ನು ಟೈಮ್ಸ್ ಮ್ಯಾನೇಜ್ಮೆಂಟ್ ಹೊಸದಾಗಿ ಆರಂಭಿಸಿದ ವಿಜಯ ನೆಕ್ಸ್ಟ್ ಗೆ ಸಂಪಾದಕರಾಗಿ ಕರೆದು ಕೂರಿಸಿತು. ಈ ಮೂಲಕ ಅವರು ಕನ್ನಡ ಪತ್ರಿಕೋದ್ಯಮ ಪ್ರವೇಶಿಸಿದರು. ಇದಕ್ಕೆ ಅವರಿಗಿದ್ದ ಏಕೈಕ ಅರ್ಹತೆಯೆಂದರೆ ವಿಪಿಎಲ್ ಸಿಇಓ ಸುನೀಲ್ ರಾಜಶೇಖರ್ ಅವರ ಜೊತೆಗಿನ ಸ್ನೇಹ.

ಈ ಸ್ನೇಹದ ಪರಿಣಾಮವಾಗಿಯೇ ಕನ್ನಡ ಪತ್ರಿಕೋದ್ಯಮದ ಗಂಧಗಾಳಿ ಇಲ್ಲದ ಇ. ರಾಘವನ್ ಇಂದು ಕನ್ನಡದ ನಂಬರ್ ೧ ದಿನಪತ್ರಿಕೆಯ ಸಂಪಾದಕರು! ಕನ್ನಡ ಪತ್ರಿಕೋದ್ಯಮ ಪ್ರವೇಶಿಸಿದ ಅತ್ಯಲ್ಪ ಅವಧಿಯಲ್ಲಿ ನಂಬರ್ ೧ ಪತ್ರಿಕೆ ಸಂಪಾದಕರಾದ ಅವರ ಸಾಧನೆ ಮೆಚ್ಚುವಂತದ್ದು! ಸಾಧನೆಯ ಹಿಂದೆ ಅಪಾರ ಪರಿಶ್ರಮ ಇದೆ!

ಸಂಪಾದಕರಾಗಿ ಅವರು ಮಾಡಿದ ಸಾಧನೆ ವಿಕ ಓದುವವರಿಗೆ ಗೊತ್ತು. ಬಜೆಟ್ ದಿನ 'ಡಬ್ಬಲ್ ಬ್ಯಾರಲ್ ಗನ್' ತನ್ನೆಡೆಗೆ ಗುರಿ ಇಟ್ಟು ಟ್ರಿಗರ್ ಒತ್ತಿದಾಗಲೇ ವಿಕ ಸಿಬ್ಬಂದಿಗೆ ರಾಘವನ್ ಏನು ಎಂಬುದು ಅರ್ಥವಾದಂತಿದೆ. ಕಚೇರಿಯಲ್ಲಿ ದಿನಕ್ಕೆ ೧೦-೨೦ ಸಿಗರೇಟು ಸೇದುವುದೇ ರಾಘವನ್ ಸಾಧನೆ ಎಂಬ ಮಾತಿದೆ. ಬಾಯಿಂದ ಸಿಗರೇಟು ಹೋಗೆ ಬಿಡುವುದನ್ನು ನೋಡಿದ ವಿಕ ಸಿಬ್ಬಂದಿ ಈತ ವಿಕದ ಹೊಗೆಯನ್ನು ಹೀಗೆ ಹಾರಿಸುವುದು ಗ್ಯಾರಂಟಿ ಎಂದು ಮಾತನಾಡಿಕೊಳ್ಳುತ್ತಿದ್ದಾರೆ.